White Ribbon Society

White Ribbon Society

WHITE RIBBON SOCIETY

Tunlai \halaite’n sualna kawng hrang hrangin kan zawh chho mek zel a. |henkhatin damdawi an ti a, zu an in bawk a, rukru na sualte leh sual chi hrang hrangin kan \halaite nun a run chho mek zel a. Kristian ram kan nihna a\ang erawh chuan he sualna zawng zawng hi Pathian thinur na thlengtu an ni vek mai awm e. Heng zinga kan sawi hmai hauh loh chu Pathian pawhin a duh loh em em leh Kristian \halaite tan a tih ve atan a rem lo em em chu a hun lo taka mipat hmeihchhiatna (sex) hman ni a ni. Tin, nupui pasal inneih hnu a mahni kawppuite laka rinawm lova midang hnena sex hman hi Pathian in a huat em em chu a ni. He sual lian takah hian kan \halaite bur an khuar chho mek zel avangin kan rama \halaite zingah veitu an rawn chhuak ta hi kan ram tan he baka Chanhchin \ha lawmawm chu a awm dawn chuang em ni.

Dt 11-13 June 2010 khan Lawngtlai District a KOhhran lian ber LIKBKTP Lawngtlai Town chuan Lawngtlai town Fakna inkhawmpui hlimawm tak neiin he hun a\ang hian \halai mi eng emaw zat in thianghlimna kawng zawh turin thu an tiam a. An thutiam tihnghetna atan Ribbon var chu la in Thianghimna kawng ka zawh dawn a ni tih mi 200 dawnin Ribbon var hi an la a ni.

He inkhawmpui ah hian Pro.Pastor C.Chanchinmawia chu Speaker atan hmangin a ni hian tunlai \halaite nuna a vei em em kan khawtlanga nula leh tlangval, tleirawl leh rawltharte sex-a kan tlan nasat zia chu a rilru-ah a rawn nung thar leh nghal a. A rilru-ah kan rama natna hlauhawm em em rawn langsar tial tial HIV/AIDS hi doin Sorkar leh NGO hrang hrangte hian nasa takin hma la thin mahse kiam lam apan chuang lo; He natna hlauhawm in kaichhawn theihna nasa ber mipat hmei chhiatna kan hmang dik lo hi Isua Krista thianghlimna nun kan neih chauhvin kan hneh thei ang tih rinna nghet tak a lo nei ta a ni.

Tichuan hetiang hian ruahmanna a siam ta a, He Fakna inkhawmpui thupui 'Ka nunin Lalpa a chawimawi e' tih thu chu Ribbon varah nem kaiin, khawmpui tawp zanah thalaite zingah chona (challenge) a siam ta a ni. Chutah chuan. 'hetianga intiam theite chuan Maicham(Pulpit) hmaa ribbon vara 'ka nunin Lalpa a chawimawi e' tih thu in ziak hi in rawn la dawn nia' tiin. Thu intiamna chu hetiang hi a ni.

"Thianghlimna nun min neih tirtu ka chakna Isua Krista rinchhanin, ka nun ka vawng thinghlim ang a, ka kawppui (Nupui / Pasal) tan chauha inserh hrangin, Pathianin kawppui (nupui / pasal) min pek ka neih hma chuan mipat hmeichhiatnaah ka intibawlhhlawh lovang."

He mi zan hian Ribbon zahnih (200) buatsaih a ni a, thalai tam tak rawn pen chhuakin maicham hmaa ribbon chu an rawn la ta a. Ribbon zahnih chuan a daih zo ta lo va, hei hian nasa takin hna a thawk nghal a, lehkha zira Mizoram pawna kal chhuak turte pawhin white ribbon chu ken an duh leh ta zel a, Krista nun thianghlimna tawmpui an duh a ni. Ribbon chang lo tam tak te chuan ribbon an order belh zel a. Amaherawh chu ribbon siam hmasa ber kha a awlsam thei ang bera siam anih avangin tha zawk leh tlo zawk, mawi hnai zawk a siam phawt a, chu mi hnu-ah hmalakna tak tak neih a tul niin a hre ta a ni.

Pathian hnenah hetiang kawnga mi thahnemngai dilin a tawngtai a, tichuan mi thahnemngai tak tak Pathianin a ko chhuak ta a. Kan rama mipat hmeichhiatna (Sex) hluar ta lutuk leh natna hlauhawm AIDS lak atanga kan fihlim theihna kawng tha ber Isua Krista nun thianghlimna tawmpui tura midangte Krista hnena hruai turin White Ribbon Society chu din a lo ni ta a ni.

In hmuhkhawmna hmasa ber: White Ribbon Society din tura hmalakna kal zel ah khawtlanga chhiatna veitu an lo in pe zel a, tichuan he Society hi din tha kan ti tlang tak tak em tih Dt.19.June. 2010 ah sawi ho hmasak a ni a, He in hmuhkhawmna an hian lungrual takin White Ribbon Society din nise tih a lo ni ta a ni.

White Ribbon Siciety chu din a ni ta: In hmuhkhawm vawi hnihna Dt. 26. June. 2010 (Inrinni) tlai lam dar thumah Pawl hruaitu thlanna neiin mumal zawkin White Ribbon Society chu din a lo ni ta a.

He pawl hian din chhan a nei a.

1. Krista thianghlimna tawmpui tura thalaite Krista hnena hruai turin.

2. Kan ram-a mipat hmeichhiatna (sex) hluar lutuk Pathian thu anga do turin.

3. Kan ram ei ral mek tu HIV/AIDS do turin.

Tunah hian \halai mi engemaw zatin he pawl hi an zawm mek zel a, he Movement hi a kal mek zel a, \halai ten thianghlimna kawng an zawh theihna turin hma an la chho mek zel a ni.

Pawl dangte ang bawkin thupui pawh neiin Pathian lehkhabu rinchhanin "Ka nunin Lalpa a chawimawi e" Luka 1:46 an thupui a ni a. Ka nunin Lalpa a chawimawi a ni ti thei \halaite tan chuan le pawl ah hian tel ngei ngei turin an sawm bawk a, \halaite thianghlimna kawng zawh ve turin Pawl leh Kohhran bik pawh awm lova ke pe chhuak \heuh turin tupawh an sawm vek a ni.

Tunah hian hma an la chho mek zel a, Mizoram a zaithiam lar tak tak te pawhi he pawl hi rawn hmelhriat chho \anin tun White Ribbon Society tan tiin khawi hmunah pawh mahni sum sengin rawngbawl turin ke an rawn pen chhuak mek zel a, Betsy Lalrinsangi, Linda Fanai, Michael VL Rema, TBC Zaithanpuia, Rosy K.Remsangpuii te leh midang pawh he pawl zawma \halaite thianghlimna kawng an zawh theihna tura hma la ve tura ke rawn pe chhhuak tur mi tam tak pawh an la awm tih hriat a ni bawk a.

White Ribbon Society hian chak zawka hma a lak theihna turin Sub-Committee peng hrang hrang a din a. The Altar (Prayer Cell), Media Wing, The Psalm (Praise & Worship team) leh The Samaritan te din a ni tawh bawk a. Tunah hian hmalak chhoh mek zel a ni. White Ribbon Society ah hian tupawh Thianghlimna kawng zawh duh a ke pen duh tan a tel theih reng bawk a. A bik takin \halaite tel tura sawm an ni a, kan tunlai khawvel a, kan \halai pui nun kawng \ha lo te chhan chhuak turin sawm kan ni e.

He pawl hian eng Kohhran mah a thliar lova, eng kohhran pawh a pawl a tui leh Thianghlimna kawnga ke pen duhtu te tan chuan a tel theih reng a ni. Pawl a nih angin thutiam \ha tak an nei a, "Thianghlimna nun min neih tirtu ka chakna Isua Krista rin chhanin, ka nun ka vawng thinghlim ang a, ka kawppui (Nupui / Pasal) tan chauha inserh hrangin, Pathianin kawppui (nupui / pasal) min pek ka neih hma chuan mipat hmeichhiatnaah ka intibawlhhlawh lovang." tih hi a ni. Hei hian tunlai a kan \halaite nun a ti lang chiang hle awm e. Chuvangin \halaite ke i pen chhuak \heuh ang u.

He society hi a Headquater atan Lawngtlai hi hman a ni dawn a, tunah hian Office mumal tak an la neih loh avangin tunah hian DA Collection Lawngtlai Bazar pheikhawk dawr hi Information Centre atana hman mek a ni a, he pawl tan a contribution nei duh tan chuan DA Collection ah hian ziak in emaw thehluh thei reng a ni a, \halaite tupawh thianghlimna kawnga ke pen duh tan a tel theih reng a ni.

September thla hian mipuite hriat ah he Society hian rawngbawlna neih \an tumin hmalak chhoh mek zel a ni a, heng an hmalakna hrang hrang a hlawhtlinna an chan theihna turin kohhran mite \awngtaipui ah an sawm a ni.

He Movement hi kan ram tan a \angkai hle dawn a, nu leh pa te pawhin theihtawp chhuah a, he pawl a tel ngam turin fate fuih mawlh mawlh hi an tih tur ni ber in a lang \an ta a. Tunlai ah Kum 18 pawh tling lo mahni thianghlimna hralh in zuar ta mai mai Lawngtlai khawpuiah pawh hian an awm nual mai a, hetiang an zela kan ram \halaite nun a nih chhoh chuan kan ram in a hma bak chu a thim chhah hle dawn a ni. Chuvangin \halaite ke pen chhuaka thianghlimna kawng zawh turin hma thar i la ang u. 

Testimony

Testimony sawi thei tur leh tun thlenga nungdama min siamtu Lalpa chu fakin awm rawh se. Tin, Christian Outlook Editorial chungah pawh lawmthu ka sawi nghal bawk e. Mite angin thu ka thiam bawk si lo a, ka ziak ngai em em bawk si lo a, ka insit khawp mai. In beisei ang leh duhthusam ka pha dawn lo hle a, mahse hriatthiamna sang tak nena min lo chhiarsak turin ka ngen a che u. Kimchang taka tarlan pawh a that rualin in tan ninawm a ni palh ang tih ka hlau bawk si a, a tlangpui chauh ka rawn ziak a ni e.

Kum 1982-ah F. Pazawna (L) leh T. Vanthuami te fa 5 zinga a tlum ber ni turin April 16-ah ka lo piang a. He kum hi kan chhungkaw tan kum duhawm leh hriatreng tlak a ni hial awm e. Lunglei Tennis Championship tournament-ah ka pa a champion-a, kan upa ber F. Zaithanmawii pawh Mizoram High School Solo Competition-ah pakhatna a ni bawk. He hlawhtlinna leh hriatrengna hmingchawiin Linda Zohmingthangi tiin kan hming an phuah ta a ni.

Ka tleirawl chhuah phat atangin Pathian rawngbawlin ram pawn leh ram thimah te kalin ka hun ka hmang thin a, mahse ka taksa hrisel lohna rawn awm tan ta, kum 2006 atang hian dam ni hmel hi ka hmu thei ta reng reng lo mai a. Damdawi Inah Emergency in min dah lut zeuh zeuh ta mai a. Kum 1-ah vawi 3 te admit ka ni a, Doctor te paw’n zâi tawh lo mai rawh, hahdam i mamawh, i hriselna hian a tuar lutuk em mai, min ti a.

Mahse Pathian ropuina hi he ka damlohna atang hian lanchhuahtir ka duh bawk si. A chang phei chuan khawsik tlun hluah hluah chunga chhungten min kai chungin ka programme neihnaah te min hruai a. Ka mitthlaah chuan heta Pathian faka ka zai lai tak hian thi thut pawh ni ila Pathian a ropui turzia leh miten malsawmna an dawn nasat turzia te ka hmu thin a, chu chuan rinnaa ke pen zel turin min fuih fo thin.

Rawngbawla ka zinchhuah lai, inkhawm tura motor-a kan chuan lai chuan ka phone a lo ri, ka chhân chuan ka u hian tap aw tuau hian ka pa damloh thut thu leh cancer rang chi a nih thu min rawn hrilh a, a rang lama haw turin min rawn chah a. Ka mittui hi a rawn dir zung zung nghal a, Pastor chuan ka u chu a be chhunzawma, thil awmzia a hriat chuan rawngbawl laklawh lai a ni bawk si nen, min tawngtaisak nghal a. Inkhawm chhung zawng thlarau indonaah hian kan awm a, ka harh thlawt lo, ka tawt up up hi a ni ber ang.

Ka haw ang nge ka haw lo ang tih ka inngaihtuah nasa a, Pathian hnenah ka Pa chu ka kawltir tawp mai a. A tuk zingah chuan Lunglei lam pan chuan chak takin kan tlan a, kawngtluanin ‘engpawh tawk ila, ka lawm zel ang ka chhandamna kulhpui a nghing ngai love, sual ralin a hneh lawng, ka Lal remruat hi, ka dai zel dawn e, harsatna zawngte’ tih hla hi ka thinlungah a ri tlut tlut a.

Kan tlan chak bawk a, Damdawiin kan va thleng chu kawtah min lo nghak thup a, a thenin min lo tah khum a. Motor atang chuan ka chhuka, ka pa mutna lam pana ka kal tur chu ka tap vak dawn emaw ka tih laiin “Halleluiah Amen” tiin ka au phei ta zawk a. Mite pawh chuan mak ti takin min en a. Thinlung hlim tak leh thlamuang em em chuan ka pa lam chu ka pan zel a, thei leh thei lovin, hlim hmel pu tak hian mi lo chibai a, ka pa ka kuah chung chuan “Halleluiah Amen” tih a ngai tlat si. A va han ropui tak em.

Tichuan ka pa chu ka awmpui ta deuh ber a. Taksa a lo chak vak bik lo nen, keipawh chu ka natna ngaite chuan min rawn tlakbuak leh tan a. Hospital-ah chuan min admit zui nghal a, ka pa khum bulah chuan min muttir ve ta a. Buai a va belhchhah duh tak em! Chutah Doctor chuan ka pa chu inlamah inenkawl chhunzawm mai rawh u, an ti a. In lama an menpui tlawk tlawk hnu chuan kei damdawi inah ka la awm ta reng a. Tichuan, August 11, 2007 chuan ka pa chuan damdawi ina damloa ka mut ve reng laiin min boralsan ta a ni.

Ka taksa chau lutuk chu ka biak theih loh a, ka pa ruang pawh ka kil ve thei lo hial a; buaipui reng hi ka ngai a ni. Ka chunga heti em ema harsatna leh lungngaihna a thlen dan ka ngaihtuah fo thin a. Mahse, a chhanna ka hmuh chu ‘ka tawrh hi Lalpan a phal, vui thei ka ni lo’ tih hi a ni. A hminga nula nih ve bawk si chuan hrisel lo, ‘damdawi inah a awm leh tawh’ tih reng te hi ka zak ve thin khawp mai. A chang leh rawngbawla ka zinna hmunah enkawl zui reng ka ni fo thin a, em em lutuka inngaih chang te hi ka nei fo thin. Heti khawpa hrisel lo chung hian Pathian rawng ka bawlna tura ka programme neihsa te chu ka tihlawhtling hram zel a. Ka la thawk tek tek chhung hi chuan Lalpa rawng hi ka bawl zel dawn tiin ka nun hi ka invui liam tawp a ni.

Keia natna te hi chu a la nep em mai, ka nu pawh cancer/zunthlum natna nei a ni a, Pathianah damna a puang ngama, ka pa aia boral hmasa zawk tura an ngaih tun thlengin chhel takin rinna avangin min la dampuia, ka chhuang takzet. A nunah Isua hmel ka hmu a ni.

Kumtin hian damdawi in hi ka lut reng mai a, fiamthu tak pawn damdawi in thawktute hian min ta neih tawp tawh a. Mahse natna khuma mu, kei aia na zawk te leh hnamdang ringlotu bulah te kalin tawngtaisakna hunte ka la nei zui thei zel thin a. Lalpa min buatsaih dan hi mak ka ti a ni.

Damdawi in ka awm hnuhnun ber chu August thla 2009 kha a ni a. Ka dam nan hian Kohhran leh mimal hian min tawngtaisak nasa tawh em em a. Ka tuar rei tawh tiin beidawng takin ka inngaihtuah thin, ‘Lalpa ti nge i rawngbawl tur hian min hmang duh tho si a, min tihdam ve mai loh le, min tidam dawn lo a nih chuan ka nunna hi la tawh rawh’ ti a Pathian hnena ka tawngtaina thu ka thian pakhat hnena ka hrilh chuan ti hian min chhang a, ‘E khai aw, nang Pathian rawngbawltu khan dawizep takin Pathian hnenah tichuan i dil a maw, khawvel mite mahin huaisen takin Setana tan an inhmangral ngam a, inti pachang la, thinlung Rambo nei ta che’ min rawn ti a. A tir chuan ka nuih a za angreng khawp mai a, ka ngaihtuah chian chuan keia tuarna hi chu a lo nepzia te ka hrechhuak a, ka Lalpan krawsah kan tan a inpekna thukzia te a rawn lang uar uar a.

Chutia mangang taka ka awm thin lai chuan he Pathian thuchang hi ka hrechhuak thin. Daniela 3:18-19 kha a ni a, “Kan Pathian, a rawng kan bawl thina chuan rawhtuina meipui ata min chhanchhuak thei si a, i kut ata pawh, aw lalber, min chhanchhuak mai ang. Chuti lo pawh ni sela, aw lalber, i pathian rawng chu kan bawl dawn lo va, i rangkachak milim din pawh chu chibai kan buk hek lo vang, tih hi hria ang che,’’ tih thu hi a ni. He thu hian min deng na hle thin, ‘Lalpa min ngaidam rawh, he ka natna leh ka harsatna tawrh zawng zawng te, ka lungngaihna te hi i duh chuan i la kiangin min tidam thei teh meuh mai, min tidam dawn lo mah la, i rawng hi ka bawl zel tho ang, ka nunpum i tan ka rawn hlan nawn leh e’ tiin thupha ka chawi ta a ni.

Heta tang hian Lalpa min buatsaih dan a dang ta daih a, ka duhdan anga kal a rem tawh lo. A chang chuan khawlaia mipui tamna hmunah te hnehna puanga au a ngai thin. Taksa chetna leh tawng hriatloh nen min hruai ta fo mai a. Khawlaiah pawh taksa chetna nena kal a ngaih changte ka tawng thin. Thlarau thianghlim chuan min khawih nasa em em mai a, ka duh anga awm lova a duh ang ang min tih a duh thin. Mite hmuhah chuan ka nuihzatthlakin min hmusit mai thei. Mahse Lalpan ti tura min duh chu huaisen tak leh thuawih taka tih hi ka damna ni tlat si a ni.

Kristaa ka unau duhtak te u, tawrh lai chuan lawm a har i ti ve thin ang ti raw? Mahse Lalpan, ‘Thinlung rambo’ nei tur hian min duh a nia. Keipawh he tawrhna phenah hian malsawmna tam tak ka chang asin. Tun thleng hian he tisa hi chu damlovin hrisel lo mah se, ka thlarau damna avang hian nasa takin Lapan chakna thar min pe a ni. Thlarau indona hunah hian tu rawng nge kan bawl kan hriatchian hi a ngai takzet a ni. Keipawh khawvel hian min tibuai ve reng a nia, thlemna tam tak tawkin kalsan tur khawvel thil uihawm tak tak te kan hmachhawn fo ang, lungngaihna ruam thuk tak kan zawh chang pawha min thlahthlam ve ngai lotu Isua Krista lam chu pan tlat ila kan tan damna a lo ni.

Lalpan malsawm rawh se, Amen.