Testimony

Testimony sawi thei tur leh tun thlenga nungdama min siamtu Lalpa chu fakin awm rawh se. Tin, Christian Outlook Editorial chungah pawh lawmthu ka sawi nghal bawk e. Mite angin thu ka thiam bawk si lo a, ka ziak ngai em em bawk si lo a, ka insit khawp mai. In beisei ang leh duhthusam ka pha dawn lo hle a, mahse hriatthiamna sang tak nena min lo chhiarsak turin ka ngen a che u. Kimchang taka tarlan pawh a that rualin in tan ninawm a ni palh ang tih ka hlau bawk si a, a tlangpui chauh ka rawn ziak a ni e.

Kum 1982-ah F. Pazawna (L) leh T. Vanthuami te fa 5 zinga a tlum ber ni turin April 16-ah ka lo piang a. He kum hi kan chhungkaw tan kum duhawm leh hriatreng tlak a ni hial awm e. Lunglei Tennis Championship tournament-ah ka pa a champion-a, kan upa ber F. Zaithanmawii pawh Mizoram High School Solo Competition-ah pakhatna a ni bawk. He hlawhtlinna leh hriatrengna hmingchawiin Linda Zohmingthangi tiin kan hming an phuah ta a ni.

Ka tleirawl chhuah phat atangin Pathian rawngbawlin ram pawn leh ram thimah te kalin ka hun ka hmang thin a, mahse ka taksa hrisel lohna rawn awm tan ta, kum 2006 atang hian dam ni hmel hi ka hmu thei ta reng reng lo mai a. Damdawi Inah Emergency in min dah lut zeuh zeuh ta mai a. Kum 1-ah vawi 3 te admit ka ni a, Doctor te paw’n zâi tawh lo mai rawh, hahdam i mamawh, i hriselna hian a tuar lutuk em mai, min ti a.

Mahse Pathian ropuina hi he ka damlohna atang hian lanchhuahtir ka duh bawk si. A chang phei chuan khawsik tlun hluah hluah chunga chhungten min kai chungin ka programme neihnaah te min hruai a. Ka mitthlaah chuan heta Pathian faka ka zai lai tak hian thi thut pawh ni ila Pathian a ropui turzia leh miten malsawmna an dawn nasat turzia te ka hmu thin a, chu chuan rinnaa ke pen zel turin min fuih fo thin.

Rawngbawla ka zinchhuah lai, inkhawm tura motor-a kan chuan lai chuan ka phone a lo ri, ka chhân chuan ka u hian tap aw tuau hian ka pa damloh thut thu leh cancer rang chi a nih thu min rawn hrilh a, a rang lama haw turin min rawn chah a. Ka mittui hi a rawn dir zung zung nghal a, Pastor chuan ka u chu a be chhunzawma, thil awmzia a hriat chuan rawngbawl laklawh lai a ni bawk si nen, min tawngtaisak nghal a. Inkhawm chhung zawng thlarau indonaah hian kan awm a, ka harh thlawt lo, ka tawt up up hi a ni ber ang.

Ka haw ang nge ka haw lo ang tih ka inngaihtuah nasa a, Pathian hnenah ka Pa chu ka kawltir tawp mai a. A tuk zingah chuan Lunglei lam pan chuan chak takin kan tlan a, kawngtluanin ‘engpawh tawk ila, ka lawm zel ang ka chhandamna kulhpui a nghing ngai love, sual ralin a hneh lawng, ka Lal remruat hi, ka dai zel dawn e, harsatna zawngte’ tih hla hi ka thinlungah a ri tlut tlut a.

Kan tlan chak bawk a, Damdawiin kan va thleng chu kawtah min lo nghak thup a, a thenin min lo tah khum a. Motor atang chuan ka chhuka, ka pa mutna lam pana ka kal tur chu ka tap vak dawn emaw ka tih laiin “Halleluiah Amen” tiin ka au phei ta zawk a. Mite pawh chuan mak ti takin min en a. Thinlung hlim tak leh thlamuang em em chuan ka pa lam chu ka pan zel a, thei leh thei lovin, hlim hmel pu tak hian mi lo chibai a, ka pa ka kuah chung chuan “Halleluiah Amen” tih a ngai tlat si. A va han ropui tak em.

Tichuan ka pa chu ka awmpui ta deuh ber a. Taksa a lo chak vak bik lo nen, keipawh chu ka natna ngaite chuan min rawn tlakbuak leh tan a. Hospital-ah chuan min admit zui nghal a, ka pa khum bulah chuan min muttir ve ta a. Buai a va belhchhah duh tak em! Chutah Doctor chuan ka pa chu inlamah inenkawl chhunzawm mai rawh u, an ti a. In lama an menpui tlawk tlawk hnu chuan kei damdawi inah ka la awm ta reng a. Tichuan, August 11, 2007 chuan ka pa chuan damdawi ina damloa ka mut ve reng laiin min boralsan ta a ni.

Ka taksa chau lutuk chu ka biak theih loh a, ka pa ruang pawh ka kil ve thei lo hial a; buaipui reng hi ka ngai a ni. Ka chunga heti em ema harsatna leh lungngaihna a thlen dan ka ngaihtuah fo thin a. Mahse, a chhanna ka hmuh chu ‘ka tawrh hi Lalpan a phal, vui thei ka ni lo’ tih hi a ni. A hminga nula nih ve bawk si chuan hrisel lo, ‘damdawi inah a awm leh tawh’ tih reng te hi ka zak ve thin khawp mai. A chang leh rawngbawla ka zinna hmunah enkawl zui reng ka ni fo thin a, em em lutuka inngaih chang te hi ka nei fo thin. Heti khawpa hrisel lo chung hian Pathian rawng ka bawlna tura ka programme neihsa te chu ka tihlawhtling hram zel a. Ka la thawk tek tek chhung hi chuan Lalpa rawng hi ka bawl zel dawn tiin ka nun hi ka invui liam tawp a ni.

Keia natna te hi chu a la nep em mai, ka nu pawh cancer/zunthlum natna nei a ni a, Pathianah damna a puang ngama, ka pa aia boral hmasa zawk tura an ngaih tun thlengin chhel takin rinna avangin min la dampuia, ka chhuang takzet. A nunah Isua hmel ka hmu a ni.

Kumtin hian damdawi in hi ka lut reng mai a, fiamthu tak pawn damdawi in thawktute hian min ta neih tawp tawh a. Mahse natna khuma mu, kei aia na zawk te leh hnamdang ringlotu bulah te kalin tawngtaisakna hunte ka la nei zui thei zel thin a. Lalpa min buatsaih dan hi mak ka ti a ni.

Damdawi in ka awm hnuhnun ber chu August thla 2009 kha a ni a. Ka dam nan hian Kohhran leh mimal hian min tawngtaisak nasa tawh em em a. Ka tuar rei tawh tiin beidawng takin ka inngaihtuah thin, ‘Lalpa ti nge i rawngbawl tur hian min hmang duh tho si a, min tihdam ve mai loh le, min tidam dawn lo a nih chuan ka nunna hi la tawh rawh’ ti a Pathian hnena ka tawngtaina thu ka thian pakhat hnena ka hrilh chuan ti hian min chhang a, ‘E khai aw, nang Pathian rawngbawltu khan dawizep takin Pathian hnenah tichuan i dil a maw, khawvel mite mahin huaisen takin Setana tan an inhmangral ngam a, inti pachang la, thinlung Rambo nei ta che’ min rawn ti a. A tir chuan ka nuih a za angreng khawp mai a, ka ngaihtuah chian chuan keia tuarna hi chu a lo nepzia te ka hrechhuak a, ka Lalpan krawsah kan tan a inpekna thukzia te a rawn lang uar uar a.

Chutia mangang taka ka awm thin lai chuan he Pathian thuchang hi ka hrechhuak thin. Daniela 3:18-19 kha a ni a, “Kan Pathian, a rawng kan bawl thina chuan rawhtuina meipui ata min chhanchhuak thei si a, i kut ata pawh, aw lalber, min chhanchhuak mai ang. Chuti lo pawh ni sela, aw lalber, i pathian rawng chu kan bawl dawn lo va, i rangkachak milim din pawh chu chibai kan buk hek lo vang, tih hi hria ang che,’’ tih thu hi a ni. He thu hian min deng na hle thin, ‘Lalpa min ngaidam rawh, he ka natna leh ka harsatna tawrh zawng zawng te, ka lungngaihna te hi i duh chuan i la kiangin min tidam thei teh meuh mai, min tidam dawn lo mah la, i rawng hi ka bawl zel tho ang, ka nunpum i tan ka rawn hlan nawn leh e’ tiin thupha ka chawi ta a ni.

Heta tang hian Lalpa min buatsaih dan a dang ta daih a, ka duhdan anga kal a rem tawh lo. A chang chuan khawlaia mipui tamna hmunah te hnehna puanga au a ngai thin. Taksa chetna leh tawng hriatloh nen min hruai ta fo mai a. Khawlaiah pawh taksa chetna nena kal a ngaih changte ka tawng thin. Thlarau thianghlim chuan min khawih nasa em em mai a, ka duh anga awm lova a duh ang ang min tih a duh thin. Mite hmuhah chuan ka nuihzatthlakin min hmusit mai thei. Mahse Lalpan ti tura min duh chu huaisen tak leh thuawih taka tih hi ka damna ni tlat si a ni.

Kristaa ka unau duhtak te u, tawrh lai chuan lawm a har i ti ve thin ang ti raw? Mahse Lalpan, ‘Thinlung rambo’ nei tur hian min duh a nia. Keipawh he tawrhna phenah hian malsawmna tam tak ka chang asin. Tun thleng hian he tisa hi chu damlovin hrisel lo mah se, ka thlarau damna avang hian nasa takin Lapan chakna thar min pe a ni. Thlarau indona hunah hian tu rawng nge kan bawl kan hriatchian hi a ngai takzet a ni. Keipawh khawvel hian min tibuai ve reng a nia, thlemna tam tak tawkin kalsan tur khawvel thil uihawm tak tak te kan hmachhawn fo ang, lungngaihna ruam thuk tak kan zawh chang pawha min thlahthlam ve ngai lotu Isua Krista lam chu pan tlat ila kan tan damna a lo ni.

Lalpan malsawm rawh se, Amen.